Zurriángamelamelunga

Atiendi, Nel Amaro

2011-04-04T23:05:00.005+02:00

Yá sé que lo de güei ye otra de les tos performances. Perruflautes, bablistes, nuevaespaños, facebookeros, rojos y non tanto: toos n'orsai de cuerpu y mediu na to reconocencia. Sabes bien que pa los xenios una boquiada ye abondo, pero entá nun ye'l tiempu. Asina que nun te pases, Nel Amaro, y volvi aína, que pal tributu qu'amerites necesitamos una llinia de creitu a plazu llargu.

Inda suenen

2011-03-30T20:11:00.012+02:00

Factoría Norte y Muyeres // Teatru Palacio Valdés (Avilés), 30 de xunetu de 2010, estrena absoluta // Reseña de Carlos Suari

Inda suenen, idea orixinal de Marisa Luque, ye una obra que texe l’argumentu -un percorríu pela vida femenina de l’Asturies tradicional- con una demostración multidisciplinar del trabayu de campu y divulgación desarrolláu por Muyeres nos sos años de trayectoria. Seique ye pertinente estremar dos ámbitos de la obra. Dos ingredientes que, ye preciso sorrayar, queden perfectamente mecíos, gracies a la mano de Factoría Norte. Ún, el tocante a cómo se constrúi y desenvuelve l’argumentu, obligaríanos a falar de la narración, de l’ambientación del escenariu, del soníu… tamién de la construcción de la obra, el so ritmu, les sos idees-fuercia, los testos, el manexu de los poderosos recursos qu’ufre la tradición pa camudalos en materia escénico. Ana Morán -la narradora dacuando participante-, natural, con voz llimpio y bien proyectao, fai creíbles los bonos testos de Susana Sela y Borja Roces, enxértase y sal de la escena con llixereza, cercanía y tranquilidá. En cuantes a la estructura y al ritmu, rescampla n’Inda suenen la so precisa cenciellez, que practica la transición coherente, usando los símbolos -el pañuelu, un suponer- como recursu escénicu maxistral. Nesti sen, son dignos de mención dellos aciertos -y namás voi dicir ún- como facer de la muerte un puntu d’inflexón y non una fin: un momentu que llueñe de rematar l’acción, abre la puerta pa un posterior pieslle intensu y orixinal. El soníu y la lluz collaboren cola ambientación austera y verosímil dexando centrar l’atención nes protagonistes.

Entrando nel apartáu de los elementos tradicionales qu’aprucen n’Inda suenen, esta crítica cuerre’l riesgu d’autodestruyise. Al primer segundu d‘apaición grupal, la indumentaria yá dexa un nuedu en gargüelu. Auténtica, bayurosa y potente, de sayes rigoroses y dengues enerxéticos, la nuesa tradición viste d’arguyu y pasu firme, faciéndonos sentir fondamente emocionaos. Con Mariluz Cristóbal Caunedo rompiendo’l xelu, como quien xuega dende la primer bola a cuatriar a grande, ye mui dable la primer y madrugadora llárima de la nueche, un respingu en tol teatru que pon a los pies de Muyeres un auditoriu desfechu. Dende ehí, la vida cantar a cantar, va pasando pelos momentos más felices y más tristes de la nuesa esistencia. Nun hai nada que dicir del nivel musical y coreográficu de Muyeres, nun hai nada que dicir de la escoyeta y el fusu col que fila Constantino Menéndez. Con esti Inda suenen, Muyeres demuestra qu’elles son el raseru, la unidá métrica cola que podemos midir cualesquier interpretación del padremuñu etnomusical, y tamién, diría, depués d’esta obra, del padremuñu motor y corporal y del potencial escénicu de la nuesa tradición. Namás añedir qu’a la calidá oxetivable del espectáculu, a les sos destreces técnica, táctica y estratéxica hai que sumar lo otro, y lo otro, señores, ye muncho: esa manera d’arimase nel baille, esa forma de dibuxar les voces nel aire… esi cimblar de les tables cuando elles triyen l’escenariu.

Inda suenen, y asina les coses, habrán siguir sonando.

Los bolos depués de Cangas

2010-07-21T09:41:00.002+02:00

Va tiempu que debo, como poco, siquiera, esti post. El 12 de xunu d'esti añu y gracies a la organización de l'Asociación del Bolu Vaqueiru, tolos amantes de los bolos asturianos tuvimos la oportunidá d'alcontranos y aconceyar alredor d'estos xuegos, que per un día, fonon, rigorosamente, oxetu d'estudiu. Tolos bolos federaos cuntanon con dalgún representante qu'espunxo pasáu, presente y futuru de cada xuegu, mentanto qu'otres esperiencies con xuegos de bolos en camín de recuperación protagonizanon la otra mesa de discutiniu. Fernando Maestro volvió a contar lo mesmo que cuenta siempre ¡y eso ye maraviyoso!, y esti qu'escribe tuvo la oportunidá de presenta-y a un foru entendíu dalgunes conclusiones del trabayu "Atles de los Bolos Asturianos". Muncho puede sacase en conclusión y, más tovía, barruntar depués de que los bolos asturianos tuvieren esti, el so primer congresu en Cangas. En pocos díes cuento rematar un articulín coles mios conclusiones y perspectives depués del eventu. Tendréis noticies d'él.

... y entós Noreña fíxose capital del liriu

2010-04-30T10:33:00.002+02:00

Bolu vaqueiru

2010-04-09T18:38:00.004+02:00

Que nun cuache la bola. Que los bolos se deiten, depués d'un vuelu violentu, acul.ló del venti. Ya volver la mano cumo Dious manda, pa que se toupen ya estoupen las maderas. Son los fotogramas d'un xuegu que se pierde na nueite los tiempos. Un xuegu que nun esqueició requeixu nengún ya foi protagonista al pía la ilesia, nu medio'l camín, na plaza'l pueblu. Agora la xente d'esta tierra afortunada en val.les ya montes, en ríos ya nieve, recupera la memoria qu'a puntu tuvo de perdese, ya'l xuegu chega al institutu, a la tele, a las boleras cubiertas. L'Asociación del Bolu Vaqueiru nun solo representa la revitalización d'esti xuegu, yía la demostración de tolas cousas que podemos faer pola nuesa cultura tradicional, l'exemplu de que los nuesos vezos siguen teniendo función, seique más que nunca, nu sieglu ventiún. De la trayectoria última d'esti xuegu muito podemos dicir. El deliciosu pasu al sistema esportivu, fiel a la información que los más viechos dienon en cada l.lugar, la organización ya l'ambiente que dan cuerpu a las competiciones de güei, ya'l perfeccionamientu técnico-tácticu al que tan chegando los mechores xugadores, son los tres argumentos que sirven pa desplicar l'éxitu social del bolu vaqueiru. Yía'l tiempu de que las instituciones nun cuachen la bola ya de que pasen un par de bolos los medios de comunicación, dándo-l.li a esti xuegu'l sitiu que merez, nel sistema educativu, nos periódicos. Ya a los de casa que nun nos temble la mano, toupando madera cona madera, arredondiando una bolada con muitos bolos, en forma de garantía de futuru.

Saluda a la temporada 2010 pa los amigos del bolu vaqueiru.

¿Científicos del xuegu tradicional? ¡Calla ho!

2010-03-31T20:15:00.008+02:00

Esti curtiu que m'unvia'l colega Juampe Ribas (profe na Universidá de Las Palmas), talamente paez que lu grabaren unos cuantos praxeólogos, xente de la ciencia ludomotriz, xente qu'amás de rigor suel andar sobrao de coña y autocrítica. Espaciu, roles de xuegu, universales parlebasianos... un análisis praxeolóxicu (cuasi) de verdá. Déxovos con Lalo Pezia Cavallieri, caricatura involuntaria del llau divulgativu del oficiu.

Asturies queda n’orsai na defensa de los xuegos

2010-02-12T20:50:00.000+01:00

Anúnciase la creación d’entidaes estatales, continentales y mundiales a les qu’Asturies nun puede llevar una voz coral.

Situación internacional
Siguiendo les idees plantiaes na reunión internacional d’espertos sobre xuegos tradicionales que se celebró en xunetu de 2009 n’Aranda de Duero (Castiella), l’Asociación Europea de Xuegos y Deportes Tradicionales (AEXDT), al traviés de los sos representantes nel Estáu Español nel Conseyu d’Alministración -Fernando Diestro, Pere Lavega, Fernando Maestro y Ricardo Navacerrada-, informaba esta mesma selmana de la voluntá de constituyir una asociación “de carácter estatal cola fin d’integrar a toles entidaes d’ámbitu español (asociaciones culturales, asociaciones de deportes tradicionales, federaciones deportives, museos, instituciones académiques...) que tengan ente los sos oxetivos la formación, la recuperación, el mantenimientu y la divulgación de los xuegos y de los deportes tradicionales”. La noticia apuerta xusto na mesma campaña en que los delegaos continentales presentes n’Aranda de Duero crearen una Federación Mundial de Xuegos y Deportes Tradicionales. Los miembros del Comité Executivu, Guy Jaouen, Jong Lee, Pere Lavega, Liu Su-I y Erik de Vroede, presentaben entós esta entidá nueva que tien como función principal la representación de la rede de salvaguarda de los xuegos y los deportes tradicionales a escala mundial. D’otra banda, va mui pocos díes, conocíase que la propia AEXDT fuera aceptada pola UNESCO como ONG acreitada en cuestiones tocantes al patrimoniu lúdicu, dientro de la cultura inmaterial de los pueblos.

Asturies
Esti refileru d’anuncies que fala d’avances na institucionalización del llabor protector de los xuegos tradicionales, garra a Asturies nuna situación precaria. Anque otros clubes y asociaciones del xuegu tradicional como Espor d’Asturies o la Peña Reculta tienen participao n’actividaes de la AEXDT, ente los miembros asturianos que la protectora europea reconoz anguaño nun hai redes de conxuntu, namás dos proxectos locales, el Muséu de los Bolos d’Asturies (Panes) y l’Asocación del Bolu Vaqueiru (Cangas del Narcea). Per otru llau, la Federación Asturiana de Deportes Tradicionales, fundada nel añu 2000, continua la so llarga hibernación cola connivencia de la Dirección Xeneral de Deportes, la Federación Asturiana de Bolos sigue dafechu superada pol so altísimu volume d’actividá y otros deportes tradicionales que se practiquen n’Asturies, xunto colos xuegos non institucionalizaos, queden nel limbu d’otres federaciones y asociaciones que nun tienen una rede na que collaborar, nin siquieramente una coordinadora, que dende lo público, bien podía trabayar poles mui necesaries sinerxes. La participación (o non) d’Asturies nestes entidaes estatales, continentales y mundiales que yá tán abriendo camín, dependerá, si naide nun lo igua, de la voluntá de xente que regala’l so tiempu a esta causa y que trabaya pa ella col cientu por cientu del so interés pero munches vegaes ensin la formación precisa pa optimizar l’esfuerzu. Asina les coses, un país como’l nuesu, agraciáu con intensidá y densidá por un repertoriu bayurosu de xuegos tradicionales, pierde col tiempu calter y pesu específicu nuna toma de decisiones que ta a piques d’entamar. Decisiones globales que van basase en voces corales neocelandeses, bretones, castellanes o marroquines, pero conforme a la traza actual, enxamás asturianes.

Santa Bárbara y la motricidá

2009-12-03T10:52:00.003+01:00

La mina vien siendo motor de creación d’actividaes motrices lúdiques. Como allongación del llabor, atopamos los xuegos de la madera, que davezu vincúlense erróneamente a lo forestal. N’Asturies, la corta, seya con tronzón o con hachu, tien un parentescu muncho más directu cola mina que cola industria maderera, y ye que de siempre, fonon los mineros los que mostraben habilidaes técniques especiales con estes ferramientes. Un exemplu d’esta reminiscencia atopámoslu nuna de les modalidaes deportificaes d’estos xuegos. Na llamada “corta asturiana” los deportistes amás de facer los cortes correspondientes, han llevantar una pequeña construcción con estielles, el llamáu "castillete". Tamién el llanzamientu de barra, paez que propiu de los canteros, puede guapamente, adscribise a esti ámbitu. Los que, de xuru, naide nun dulda n’emparentar cola mina, son los concursos mineros ente los que siempre rescamplanon los d’entibadores. Unes competiciones que tuvienon muncha sonadía per Santa Bárbara y que n’Asturies, amás, consiguienon algamar ciertu prestixu internacional. Más allá de la mina taba’l chigre o la plaza’l pueblu, y nellos, yá como desconexón de les xeres minerales apaecen de punta a rau, pel nuesu país, los bolos, que nes mines del occidente yeren al estilu de Cangas y Tinéu y nel centru, la cuatriada.

Misteriosu nome misteriosu

2009-11-30T19:45:00.006+01:00

Hai un refileru de nomes pa otru refileru de xuegos que tienen en común la esistencia de dos palos, unu que ye pequeñu y fai de móvil y otru más grande que furrula como implementu. Talla, biyarda, palichu o bríndola son namás cuatro exemplos de nomes pa esa -podíemos dicir- familia de xuegos que mui xeneralmente conozse como liriu o liriulariu. A los falantes escolarizaos nesti idioma suel chocanos que seya liriu y non *lliriu'l sustantivu que nos regala la tradición. Pero ye que tamién aprucen iriu o iriariu, como si namás importaren eses rimes mántriques ("-iriu, -ariu, a casa'l boticariu" o "-iriu, -ariu, a la pica'l campanariu"). Y cuidadín, porque estes palabres misterioses retumbeyen dicá Bascoña con esi "irulario" (sic.) que tien rexistrao, ente otros, Garmendia Larrañaga mesmo nel so Ume Jolasak de 2007. Nun soi filólogu, nin lo quiero ser pero... ¿y si "l'iriu" fore la respuesta a esti enguedeyu tan prestosu? "Faigan xuegu".

Proxectu rematáu busca editorial

2009-11-23T14:55:00.002+01:00

Que quede guapo. Entendible pero ensin ser fato. Científico y prestoso. Visual. ¿Billingüe? ¿Trillingüe? Rematé l'informe del Atles de los Bolos Asturianos y agora los bocetos piden ser papel cuxé.

A ver si eches un bolu arriba, maizón

2009-11-20T19:26:00.005+01:00

A estos dos nun fai falta dicí-yoslo porque yá los echen como churros, y non cómo nós, los globeros de los bolos. Por cierto, pensando en qu'esto ye lo que llamen bolu celta igual llevastis un chascu al ver que Jovi (fenómenu) gasta playeros modernacos. Efectivamente y non llevamos pelleyu de cabra nin tocamos la cuerna los que xugamos a esti remake del estilu propiu de la parte Tinéu. Que preste.

Afayáivos, si eso.

2009-11-20T13:17:00.002+01:00